lu za'ure'u gau draci lo ka gubni sei fe lu'e lo ve ciksi be lo larcu reci bangu cu fanva se'u

By Yoshinori Niwa (author), la ponjbogri (translators)

lu za'ure'u gau draci lo ka gubni

sei fe lu'e lo ve ciksi be lo larcu reci bangu cu fanva se'u

to lo poi la .ni,uan.iocinor. cu cmizu'e fi ke'a ku'o selpla be ca lo
detri be li renonovo ga'o bi'o ga'o renopare toi li'u






ni'o pa mo'o

lu lo djacu senta xi abu cu gau muvdu lo djacu senta xi by li'u

de'i li renonovo fi'o vreji lo tigni skina ne lo mentu be li pano pi
muci ju'u xano

.i tu'i lo stuzi be le nu la belin pu ze'u pu zasti be'o lo nu tigni lo
nu lo djacu senta cu gau muvdu lo drata djacu senta ku pi'o lo moklu .i
ca lo nu preti lo nu gau mi pe lo gugdejupu natmi ku mokau srana lo
stuna jo'u stici nabmi ne mu'u lo lenku jamna e lo bitmu pe la belin kei
jinvi lo du'u fi'o kakne mi gau mi lo djacu senta cu gau muvdu po'o
teka'a la belin pe lo slabu stuna ku seka'a la belin pe lo slabu stici
.i i'u ba'a lo nu lo du'u na kakne lo klacliva kei citri fatci ri'a lo
bitmu be'o kei na canci gi'e ca'o vreji .i ba ku cu pu mintu tigni tu'i
lo ro foldi pe munje






ni'o re mo'o

lu lo flanaltinbe ke jipci cange li'u

de'i li renonovo se tai lo se tigni

.i ge ca lo nu la cipni .influenz. terbi'a cu preja lo ponjo kei temci
be lo se detri be li renonovo pi'e xa bei lo se detri be li pi'e pare gi
fe lo jipci poi zvati lo jibni be lo mi zdani ku'o goi jy. fi'o kansa lo
rokpisterci'a jo'u lo rokpinsi cu klama penmi gi gau cipra lo du'u tavla
jy. ma kau .i cusku co tcidu lo djekarni gi'e ciksi lo nuzba be lo fasnu
be tedi'o lo munje .i se mupli lo rakso jamna .e lo merko jatna cuxna .e
lo .taifun. vilti'a tolprali .i danfu lo preti be fi vo'a noi se du'u lo
betri be ma'a cu me jy. mo kau .i se pa'a lo nu na ka'e tavla gi'e se
tavla vau lo jipci kei lo du'u .ei lo ma'a ka cusku simxu pe lo cecmu be
lo prenu cu mo kau cu rapli se preti pe'i






ni'o ci mo'o

lu .i klama lo festi rinci stuzi pe la sanfransiskon mu'i lo nu se rinci
lo mi zdani festi li'u

de'i li renonoxa fi'o vreji lo tigni skina ne lo mentu be li paze pi
cici ju'u xano

.i benji lo festi pe lo gugdejupu seka'a gugde'usu .i xeka'a lo vinji ku
fi'o sirji ku lo mi zdani festi cu xance se benji gi'e gau zo'e rinci
seka'a lo festi rinci stuzi pe la sanfransiskon ge'u ku .i sepi'o lo nu
fange ganse noi lo ka vofli bancu lo gugde fi'o ponse lo foldi nabmi kei
gau zo'e se preti lo nu lo gugdejupu makau srana lo gugde'usu noi ke'a
ponse so'i lo ka ckini be ji'u lo jecta je jikca stura be'o .i pau lo
festi poi mi ta'e zbasu cu klama ma ma






ni'o vo mo'o

lu .i lu xance jgari lo panono mlatu tu'i lo gugdrnorge li'u

de'i li renonoze fi'o vreji lo skina ne lo mentu be li pamu pi noxa ju'u
xano

.i tu'i la stavangarn poi ke'a tcadu lo gugdrnorge ku ru'i xance jgari
lo klacliva mlatu .ije troci lo nu panono mlatu cu se snada .i pa'o lo
nu jikca canja be lo remna joi lo mlatu poi lo nu valsi casnu na kakne
kei preti lo nu snada be lo barda smuni be ta'i lo cmalu penmi kei .i
tu'i la stavangarn pe lo xastcana tcadu zi'e poi ke'a se tcima lo midju
dunra ni'a lo bisli dunja gradu .i lo fatci skina noi bajra pagre gi'e
jersi lo mlatu

.i to'i sa'a finti va'o lo nu jikca ku no'u ga'e ty.obu.abu.y'y.bu to'a
pe lo midju be tezu'e lo cabna larcu be'o pe ga'e ty.obu.ubu kunti.bu
sycy.ebu.ny.ebu to'a ge'u ge'u ge'u zi'e pe lo gugdenu'o toi






ni'o mu mo'o

lu lo se morji be fi lo nu kansa lo stagi li'u

de'i li renonobi fi'o vreji lo tigni skina pe lo mentu be li pavo pi'e
nono

.i bu'u lo jungo .canxain. tcadu ge jgari lo najgenja .a lo brukobli .a
lo bolsluni mu'a no'u lo stagi poi bu'u lo se klama ku frili ke vecnu
cpacu gi si'u ro lo viska cu terxra fi lo morji ke kacma pixra .i ba ku
ba lo nu xruti fi lo gugde cu pu zbasu lo pixra lo cixa mei gusyvelvei
.i ge fi lo poi pu'e la'e di'u jai mulno ku'o cixa pixra fe lo braxra cu
zbasu gi fi loi no'o prenu poi cmima zukte ku'o fu lo gugykruca xe mrilu
cu xruti benji .i la'e dei se krasi lo nu troci co djuno lo du'u fi lo
nu pa po'o roi penmi ku fe ma kau no'u lo te ckini cu ka'e zbasu .i ge
lo stagi poi frili cpacu ba'e na rirci gi ku'i pu jarco lo du'u lo nu
co'a mutce vreji lo se morji lo'e zasti be ro da cu cumki






ni'o xa mo'o

lu .i .ai vecnu lo do se vasxu mi pa lo jungo rupnu .i ji'a .ai mi vecnu
lo da se vasxu fo pa lo jungo rupnu li'u

de'i li renonobi se tai lo se tigni

.i bu'u lo jungo .tcend. tcadu ge fi lo viska cu gubni cusku lo nu .ai
vecnu lo ri se vasxu mi pa lo jungo rupnu gi lo se vasxu lo slasi dakli
cu gau nenri se va'u mi .i ji'a fe lo bi'u nai se vasxu lo djica pa lo
jungo rupnu cu vecnu .i ge li'a ni'i lo nu mi fo pa da vecnu gi'e te
vecnu ku no da prali gi ge mi tarti lo po'o jai va'o canja gi temu'i mi
cu troci lo nu lo viska cu gau frati lo se djica .i la'e dei nu tigni
tezu'e lo nu se tai lo rarna cu gasnu lo fasnu .i ca lo nu vecnu lo
melbi ninmu se vasxu kei lo nu vecnu jivna cu pu rarna fasnu .i ba lo
fanmo lo tadni poi djica lo nu vecnu lo mi se vasxu cu pu so'i mei






ni'o ze mo'o

lu gaurpikapikapika la .taman. noi larske balcu'e li'u

de'i li renonobi fi'o tigni skina to mentu li pavo pi'e papa toi

.i ze'a lo mentu be li ji'i cino gasnu lo nu rapydi'e di'i lo snidu be
li mu fa ro tergu'i pe lo nunctuku'a ju'e lalku'a ju'e nerklaji ju'e
lajytergu'i ju'e barjunla pe la .kaminogen. noi kuldi'u zi'e pe la
.taman. noi larske balcu'e .i va'o lo se lifri be fi'o kansa so'i
mukyzu'e guncmi cu troci lo nu galfi lo zi zei canci ba'e nunrapydi'e lo
basycau nunji'e pluka .i seja'eku jvinu lo poi toltinbe lo mu zei snidu
gradu ku'o kampanrycau carmi ke velcu'e ke ctuku'a nunrapydi'e .i pu'i
finti fo lo si'o lo drata cu kanpo'e ja te kansi'o






ni'o bi mo'o

lu nunjmaji pixra be lo zexa mei bei tezu'e no da li'u

de'i li renonoso fi'o .lamdas. prina to vi'a miltre li mucino fa'u
vonono toi

.i mi noi pa mei litru ku'o ne'a la .cynyn. noi slanydi'u zi'e poi me lo
misyselji'u po lo tcartoronto ku'o platu tu'a lo nunjmaji pixra be lo
tcartoronto xabju .i sei selfi'i tcila bagi kajde fi lo nu nunjmaji
pixra tezu'e no da gi ro se pixra ta'i tu'a vo'a sisku lo terzu'e .i
troci lo nu finti fo lo sampu nu lo prenu co'a jmaji .i lo prenu poi vi
se pixra cu narsau simxu .i mi'o ma poi kuspe cu tercme zo ma'a .a zo
mi'o

.i to'i sa'a sidju fa la'o zoi FADO Performance Inc, Canada zoi toi






ni'o so mo'o

lu gau speri'i ti'u li re pe lo tcecte ni'a lo lajytergu'i seva'u lo
pendo poi nu'o jdice fi lo nunspe li'u

de'i li renonoso fi'o .lamdas. prina to vi'a miltre li parenono fa'u
pamunono toi

.i sei krasi ca lo nu lo tcesau pendo goi ko'a nu'o zu'ejdi lo nunspe
kei mi stidi lo nu gau mi ko'a dasni lo .uendidrese fa'u lo taksido gi'e
se pixra .i ki'ugi co'u sidbo fi mi fa lo valsi pe seva'u ko'a gi me lo
selfi'i poi cipra lo nu mi ko'a za'o srana ta'i makau .i ti'e ba lo nu
mo'u finti kei ko'a ja'a spebi'onu'e






ni'o pano mo'o

lu nivji cikre lo zdani be lo cipni be'o poi ba'o se vimcu ku'o bu'u lo
drudi be lo muzyku'a li'u

de'i li renopano vefi'e lo zdani be lo cipni be'o poi ba'o se vimcu ku'o
.e lo .kamfor. tricu .e lo dertu .e lo stapa zbepi fi'o vreji lo skina
pe lo mentu be li pare pi pa ju'u xano

.i tu'e ce'o gi te dunda lo zdani be lo cipni be'o poi lo gugypausle
ke'a ba'o vimcu tezu'e lo nu vimcu lo xlali danlu ku'o gi bu'u lo tricu
poi punji ke'a ne'i lo muzyku'a ku'o sepi'o lo remna xance cu za'umoi
nivji cikre zy tu'u .i zu'o pe'a zo'e lo zdani cu ce'o gi jai gau daspo
gi zbasu co cikre kei sei lo no'a cu to'e te jimpe .i lo go'i cu jai
ta'i preti fai lo sedu'u lo danlu noi ke'a ma'a po'u loi remna na'e ka'e
jikca ku'o nitcu makau pe ma'a .i zu'o pe'a bu'u lo jai bu'u simxu be
fai lo'i su'o re cecmu bei lo ka ge na'e ka'e fanva tu'a ce'u fu tu'a
ce'u gi ce'u ce'u lamji be'o zo'e sezreispu lo te ciste po'u vo'a sei lo
no'a ku lo .zen. nu preti ja danfu cu simsa






ni'o papa mo'o

lu le cribe lo cribe cu penmi co klama lo mivdalmuzga li'u

de'i li renopano fi'o vreji lo tigni skina pe lo mentu be li rexa pi
mure ju'u xano

.i fo lo pluta be fi lo .u'enon. tcana bei fe lo .u'enon. mivdalmuzga
be'o no'u lo jai bu'u surla be fai lo'e xabju ge'u fa mi poi dasni lo
cribe tarmi pilka gi'e cadzu fi lo vomei ku'o klama tezu'e lo nu penmi
lo fatci cribe .i sei ku'i lo du'u to'e fatci cribe cu frili jimpe se'u
loi prenu poi penmi bu'u lu'a lo ve pluta ku'o .i'o zukte vetai lo ka
sarji lo zu'o go'i .i ku'i ca'o lo nu fa'a klama lo mivdalmuzga kei loi
bandu be lo mivdalmuzga .a'edai gau zenba .i .oi rore'u nu le cribe loi
bandu cu vlile damba .i ge te cfika lo nu le cribe lo cribe cu penmi co
klama gi karbi lo'e kampu xabju tu'a lo mivdalmuzga noi se jitro ku'o lo
ka frati ce'u .i lo nu go'i cu jai ta'i preti lo za'i ca'o ji'o gubni
stuzi






ni'o pare mo'o

lu fe lo zerle'a cu xatra tavla li'u

de'i li renopano fi'o vreji lo tigni skina pe lo mentu be li vo pi muvo
ju'u xano ge'u .e lo .lamdas. prina poi vi'a miltre li parenono fa'u
parenono

.i lo bitmu cpana po'e su'o re banxa dinju be bu'u la .xelsinkis. gau
minra fo lo pinka po'u lu doi romei .io be lo zerle'a lo cabna cu mapti
lo nu zerle'a li'u .i pu go'i sepi'o lo barda te gusni ca so'o nicte pe
ba lo nu lo banxa de'a zukte .i lo nu bu'u lo'e baxseljibri claxu dinju
cu tavla lo'e to'e jikca no'u lo zerle'a cu ju'a nu jikca lo fange poi
mipri nenri lo cecmu .i lo viska be le de'u sinxa ka'e se xanri jo'u gi
po'onai lo zu'o pante lo nu banxa pracmu gi'a sivypo'eci'e nunpo'e gi lo
cnijbi fadni ke merodava'e nu zerle'a

.i to'i sa'a finti va'o lo .xelsinkis. gugykruca ke larcu jikca selpla
pe lo gugdefu'i ji'u lo cecmu ne xygylysy toi






ni'o paci mo'o

lu lo zo iurusun navni tubnu li'u

de'i li renopano fi'o vreji lo navni tubnu poi vi'a miltre li vonono
fa'u li xanono

.i pu cpedu lo nu zbasu lo navni tubnu goi ko'a noi se pilno fi lo
dijbartu tanbo bo venynoi .i ko'a se tarmi lu'e la iurusun noi se smuni
lo du'u fraxu ku'o ji'u lo xance ciska pixra .i le valsi ckini lo no
venynoi nunspedu poi lo navni tubnu cu bilga tu'a ke'a .i cusku lo
nunzukte .e na'e bo lo notci .e na'e bo lo smuni gi'e pensi lo ca'o
cenba ckini be lo drata ku voi du'u makau cu mokau fraxu makau .i lo nu
fraxu lo drata nunsrera kei mo xlura lo sevzi






ni'o pavo mo'o

lu bevri renro salci lo fairpaltrusi'o krici bu'u la romanias. li'u

de'i li renopano fi'o vreji lo skina be lo jikca nunzunti nuntigni bei
fi'o mentu li reso pi noso

.i bu'u la bukurect. noi nanca be li reno balvi le la romanias.
ci'ernunbi'o goi ko'a loi citno goi ko'e poi na djuno ko'a cu bevri
renro salci lo fairpaltrusi'o krici je te trudjigri goi ko'i .i ti vreji
lo nu jasysnu be lo nu bevri renro salci kei be'o tavla loi truni .e loi
truni gasnu prenu poi krici lo fairpaltrusi'o .i bapli lo nu ko'e penmi
ko'i bu'u lo dinju drudi bu'u la romanias. noi sutra jikni farvi fi'o
ponse lo rorlei jbini kamfrica be seja'e le ci'ernunbi'o .i ta'i lo nu
zbasu lo dukti nu ko'i noi terji'i lo xlali citri cu bevri renro se
salci ku tolse'a lo se cinmo be fi lo tolmo'i bo tolcu'i purci jikca
siste .e lo zasti se cusku be fa lo diko xabju bei fi lo truni

.i to'i sa'a se sarji zoi gy. Pavilion Unicredit, Romania gy. toi






ni'o pamu mo'o

lu cadzu sefa'e lo nunja'odzu li'u

de'i li renopapa fi'o vreji lo tigni skina to noi mentu li pano pi nopa
toi .e lo bukpu poi prina to vi'a miltre li rexanono fa'u li pavomuno
toi

.i ru'i po'o ku fi'o pamei mi fatne cadzu ca'u bi'o ti'a loi so'i pante
ratnenfanri ja'odzu bu'u la cinjuk. .i viska lo ralci firselsku je se
cusku be loi se cuntu poi se cpasu ca lo nu le pa nanmu goi ko'a cu
fatne cadzu seru'u lo prenu fi'o se tarti lo nu ko'a na ckini lo
nunja'odzu selcku .i ta'i la'e di'u ku troci lo nu gau porpi fa le
nunja'odzu noi gunma fasnu lo se cuntu sevzi klani .i se finti lo si'o
lo nu cadzu sefa'e lo nunja'odzu poi jarco lo pa jecta notci kei ji'asai
ka'e drata nunja'odzu






ni'o paxa mo'o

lu terve'u lo mi se ponse bu'u lo tcadu zarci li'u

de'i li renopapa fi'o vreji lo nuntigni skina to lo ci ve vreji toi goi
mentu li ze pi noxa .e li so pi civo .e li xa pi noxa

.i ca lo nu bevri lo pu se terve'u be mu'u lo jeftu plekarni .e lo grute
ku troci lo nu terve'u lo mintu bu'u lo drata zarci .i ta'i lo vi ke
cimni clupa simlu ke'e nungasnu ku ribvi sakli cliva lo djedi pe lo
rapli be fa lo nunterve'u .e lo nunponse .i ne'i lo ma'a jikni siste
roda roroi gu klama fi makau gi se bixygau fi lo selve'u ca'u lo prenu
gi'e mulno fa lo jdini nunpleji .i jarco le cizra stura bo kevna poi
noroi cumki ne'i lo fadni jikni nungasnu zi'e poi ku'i roda kakne tu'a
ke'a nagi'a djica .i .uanai ma'a terve'u ma gi'e cpacu ma






ni'o paze mo'o

lu lo zo tamera,un navni tubnu li'u

de'i li renopapa fi'o vreji lo navni tubnu poi vi'a miltre li remuno
fa'u li vomuno

.i pu cpedu lo nu zbasu lo navni tubnu poi se tarmi lu'e la tamera,un
ji'u lo xance ciska pixra .i lo mivru'e cu ru'i culno lo vrici nunjdice
.i lo du'u selfi'u je xlafri je toljdi lo nunjdi cu smuni zo tamera,un
bau lo banjupunu .i le nunjdice cinmo cu prenu vrici kamxanka gi'e se
pensi cinmo fi lo drata prenu gi'e nunterpa gi'e marde sidbo gi'e munje
sidbo fatne manri .i lo prenu na kakne lo nu na djica lo nu simxu bo
casnu snada troci ta'i lo ro bangu ja xadni te mifra mu'i lo nu vimcu lo
kamseicni .i ta'i lo nu tolse'a le valsi poi se venynoi smuni noda zi'e
poi notci fe lo tolklina sidbo zi'e poi ckaji lo ka cmecau cu mojgau lo
telcku lo slabu prenu nunckini poi nenri lo ti valsi






ni'o pabi mo'o

lu kansa te kacmyxra tezu'e no da gi'e cmibi'o lo fange kansa kacmyxra
bu'u le la busan. tcadu li'u

de'i li renopapa fi'o vreji lo notci tanbo goi ko'a poi vi'a mitre li ci
fa'u li xa .e lo kacmyxra poi cpana ko'a

.i kansa te kacmyxra tezu'e no da bu'u la busan. .i ma'a so'eroi kansa
te kacmyxra tezu'e lo se morji be lo cecmu .i ku'i lo gasnu cecmu ti na
filsmu .isemu'ibo lo ro cecmu cmima cu bilga smuni jmina .i ji'a lo
cecmu korbi cu se cpifu .i lo kacmyxra cu barda se bixygau gi'e se punji
fi lo notci tanbo bu'u le tcadu .i ta'i lo to'e rarna kansa kacmyxra .e
lo nu te kacmyxra kei noi frili jikca fasnu troci fakci lo ma'a cecmu
nenri bo sidbo .i ma smuni zo ma'a noi slabu valsi gi'e so'iroi se cusku
ca lo nu ma'a crane zgana le ti munje

.i to'i sa'a se sarji le la busan. relna'anunjarco zu'ekamni toi






ni'o paso mo'o

lu bu'u le la xak.kodas. cmana galraipau dregau lo rokci poi se jajgau
fi lo xamsi loldi li'u

de'i li renopapa fi'o vreji lo gungunma skina to li revo pi revo se
mentu toi .e lo ci pixra poi vi'a miltre li cinonono fa'u li cinonono .e
lo cartu

.i jajgau lo rokci poi se derse'a fi le me la .a,omoris. blotcana gi'e
gasnu lo cmana galraipau zmadu fi lo ka galtu fo lo mitre li pa ta'i lo
nu bevri lo cmalu rokci le la .akakuras. cmana noi jbini le la
xak.kodas. cmana ca'o lo detri li so'o .i la'a lo nu go'i kei simlu na'e
sarxe lo rarna javni lo nu lo rirxe cu flecu zo'e lo cmana lo xamsi gi'e
lo rokci se bevri lo ti flecu .i ta'i lo ke clani je nandu je ku'i cmalu
ke'e se zukte seri'a tu'a le la xak.kodas. cmana no'u lo gugde jitro
panka za'ure'u pensi lo te ckini be fa lo remna bei fe lo rarna .i ji'a
ta'i lo nu lo diklo xabju goi ko'a poi se penmi fi lo verkla mu'u lo
skori karce .e lo cmana dargu ku te ciksi fe lo nu ke rokci bevri ke'e
je ke cmana galtu gasnu ke'e kei gi'e cfipu ko'a kei pensi lo sidbo be
lo rarna bei mi

.i to'i sa'a se sarji le la .a,omoris. gugykruca larcu mijbriju toi






ni'o reno mo'o

lu ki'arzau lo cribe bu'u la bern. li'u

de'i li renopapa fi'o vreji lo gungunma skina to noi mentu li paze pi
voze toi

.i si'u lo so'i diklo xabju goi ko'e ki'arzau je ckire je salci lo cribe
goi ko'a poi se rirni bu'u la bern. .i lo la'e dei gungunma cu preti lo
du'u cusku makau ko'a noi noi jai se ckaji la bern. gi'e menli sevzi
ko'e .ipubo retsku lo du'u ko'a mojgau ko'e makau kei ko'e .i la'e di'u
se vreji lo skina .i pau nai ma'a cusku ma lo cecmu .i ku'i va'i da'i
nai go'i fi ko'a .i ri'a lo nu ko'a na jimpe lo bangu kei lo no nunfrati
cu se cpacu .i lo tcini be mu'u la'e di'u cu cafne nabmi fi lo mi'o
mivru'e

.i to'i sa'a se sarji la bon. festival. bu'u le gugdrxelvo toi






ni'o repa mo'o

lu bu'u la .istanbul. rapli fa lo nu canja lo ronru'u la liras. no'u lo
gugdrturkie rupnu soi vo'e vo'i pu'o lo nu claxu lo jdini li'u

de'i li renopapa fi'o vreji lo nuntigni skina to noi mentu li remu pi
pano toi

.i bu'u lo fange rupnu zarci be ne'a le barda zarci no'u lo misno
selviska pe la .istanbul. rapli fa lo nu canja lo ronru'u la liras. soi
vo'e vo'i pu'o lo nu claxu lo jdini .i ca lo nu muvzva lo stuzi be lo
simsa fange rupnu kei ku ca lo nu le zarci selve'u cu nalvai kei ku
rapli sei no'e cinmo fa lo po'o nu rupnu canja .i lo vreji skina be lo
nu cirko lo jdini noi mutce vajni lo litru ku'o tezu'e no da .i troci lo
nu tigni lo nu prenu jikni criko bu'u le gugdrturkie noi te kruca lo
zdotu'a lo rontu'a .i la'e di'u jarco lo cabna ropno xlajikni






ni'o rere mo'o

lu sisku la vladimir. lenin. bu'u lo kumyzda pe la maskyVAS. li'u

de'i li renopare fi'o vreji lo gungunma skina to mentu li rexa pi pavo
toi fi'o se jarco tu'a loi dacti poi ve pixra la lenin. zi'e noi
pamunomei

.i sisku ro da poi zvati lo kumfa be la maskyVAS. za'o lo nu ca li
pasosopa la soviet. porpi gi'e velvi'u pe la vladimir. lenin. goi ko'a
poi pamoi jetna be la soviet. .i vitke lo fadni lanzu be la maskyVAS.
gi'e sisku lo ro dacti be ko'a be mu'u lo prexra .e lo kamcyxra .e lo
gubyselji'ipe'a notci .e lo djekarni selci'a .e lo lanci .e lo
seldasyba'a .i lo ro se sisku cu bevri fi lo nunjarco stuzi gi'e se
jarco ca'o lo nunjarco .i sepi'o le zdani ke bapli sisku noi mojgau la
kygebyb. no'u lei selmipri pulji be la soviet. seri'i lo nu mi'a cmalu
jasysnu je tavla be loi tcadu xabju .i klina jarco lo se morji fi la
soviet. noi pu porpi lo ca rusko kulnu

.i to'i sa'a se sarji le la maskyVAS. tcadu cabycedra larcu muzga .e le
gugykruca jikca dincmu toi






ni'o reci mo'o

lu ckupra lo lardai liste noi xe fanva fi lo cixa bangu li'u

de'i renopare se tai lo te platu

.i ckupra lo liste be lo'i ro ve ciksi be fi lo lardai te platu poi
gasnu ke'a ba lo se detri be li renonovo be'o poi fanva fi lo cixa bangu
fu ke'a .i lo bangu sei krasi se finti zo'e lo nu lo'i stuzi cu simxu lo
nu casnu .i ku'i va'o lo cabna kluce'u noi ca'o gugykruca ku bu'u so'i
purfarvi gugde lo glibau no'u le fange bangu ca'o fadni se jimpe .i fi'o
se fapro le nu gugykruca bapli turni lo runbau be mu'u la .esperantos.
pu ca'o se finti .i lo vi lardai liste cu xe fanva fi lo cixa bangu poi
cunso se cuxna fi lo du'e bangu be bu'u lo terdi .i lo nu jarco lo nu le
munje be lo ci'i bangu co drata be lo bangu poi lo pa tcidu cu nitcu cu
ca preja kei se danfu .ia le xanri sevzi poi ma'a ponse

.i to'i sa'a se sarji zoi gy. mirror publishing gy. toi






ni'o revo mo'o

lu lo zo demonen navni tubnu li'u

de'i li renopare fi'o vreji lo navni tubnu poi vi'a miltre li vonono
fa'u li munono

.i cpedu lo nu zbasu lo navni tubnu poi se tarmi lu'e la demonen lu'u
po'u lo xance se ciska zi'e goi ko'a kei lo certu .i norla'e fa lo nu
ko'a se smuni la demonen po'u lo du'u ja'odzu ju'a goi fo'a ge'u jikau
la demonen po'u lo du'u ku'i frica ju'a goi fo'e .i ku'i ta'i lo nu
zbasu lo navni tubnu poi lakne fa lo nu se smuni fo'a .e fo'e stidi lo
nu lacri fa lo smuni nunjdice fe lo prenu menli tcini






ni'o remu mo'o

lu sisku la vladimir. lenin. bu'u lo kumyzda pe la maskyVAS. li'u

de'i li renopare fi'o vreji lo gungunma skina noi ci naxle ve vreji to
mentu li bi pi vono toi

.i sisku ro da poi zvati lo kumfa be la maskyVAS. za'o lo nu ca li
pasosopa la soviet. porpi gi'e velvi'u pe la vladimir. lenin. goi ko'a
poi pamoi jetna be la soviet. .i vitke lo fadni lanzu be la maskyVAS.
gi'e sisku lo ro dacti be ko'a be mu'u lo sevzi pixra .e lo kamcyxra .e
lo gubyselji'ipe'a notci .e lo djekarni selci'a .e lo lanci .e lo
seldasyba'a .i lo ro se sisku cu bevri fi lo nunjarco stuzi gi'e se
jarco ca'o lo nunjarco .i sepi'o le zdani ke bapli sisku noi mojgau la
kygebyb. no'u loi selmipri pulji be la soviet. .i klina jarco lo se
morji fi la soviet. noi pu porpi lo ca rusko kulnu .i za'ure'u cusku'i
fu lo ci sorvidni fe lo vreji lardai poi se finti terzu'e lo gunma
nunjarco be me'e zoi gy. Double vision: Contemporary Art from Japan gy.
bei de'i li renopare bei bu'u le la maskyVAS. tcadu cabycedra larcu
muzga

.i to'i sa'a se sarji le la maskyVAS. tcadu cabycedra larcu muzga .e le
gugykruca jikca dincmu toi






ni'o rexa mo'o

lu setca lo ponse jdini lo dargu li'u

de'i li renopare fi'o vreji lo gungunma skina to mentu li ze pi reno toi

.i setca lo ponse jdini lo venzmi poi fe'e di'inai zvati gi'e cliva
.ibabo pu'o lo nu da facki ku le venzmi cu ca'o jarco lo jdima .i no
djuno lo nu le jdini ba ge'ikau se ponse zo'e gi se xruti zo'e fo lo se
cirko .i zbasu lo jdini poi no ponse ta'i lo nu zasni cliva lo nunvecnu
ciste noi mutce lo ka ciste






ni'o reze mo'o

lu ja'odzu fe'eco'u lo .fujin. cmana stedu fe'eco'a lo tertrube'e gubzda
li'u

de'i li renopare fi'o bukpu jo'u ximje'epri to vi'a miltre li pavomuno
fa'u rexamuno toi fi'o mudri

.i ximje'epri lo tcebra bukpu fa lo cando pixra po'e lo mintu finpla
skina .i gau bancu lo facnilbra ja'e lo nu lo xradatni cu xlabi'o ja'e
lo nu vimcu lo pixra kamymle gi'e basna lo du'u zukte .i va'o lo nunja'o
cu pilno lo bukpu tcila po'u lo nu ja'aru'e klina lo gusni ku'o gi'e
punji lo ctino be lo graku poi cadjai lo pixra ku'o lo xradatni fau lo
nu na pinta .i lo ctino pe ne'i lo xradatni cu simlu lo ka pixra lo ca'a
tumvinkoi .ibo me ge'ikau lo bu'u ca'a tumvinkoi gi lo greku ctino .i
gau danfu nandu secu'u lo kamnorla'e pe lo vanbi be mi'o






ni'o rebi mo'o

lu ja'odzu fe'eco'u lo .fujin. cmana stedu fe'eco'a lo tertrube'e gubzda
li'u

de'i li renopare fi'o .diazon. blapri jo'u jacre'ipenbi to paxa mei fi
lo vi'a miltre be li musovo fa'u bivopa toi

.i cartu bredi blapri fi lo cando pixra po'e lo mintu finpla skina gi'e
te jmina lo jacre'ipenbi xraci'a .i to'e stika punji lo kamnamsanji pe
ra'i lo finpla pruce tai lo valsi .i lo blapri ganai zenba lo temci gi
jdika lo skari fi'o stali lo po'o valsi






ni'o reso mo'o

lu ja'odzu fe'eco'u lo .fujin. cmana stedu fe'eco'a lo tertrube'e gubzda
li'u

de'i li renopare fi'o relplita vidni ke punji larcu to roda mentu li
pamu pi'e remu toi

.i brebei lo barda lanci gi'e pagbi'o lo ratnenfanri nunpante be ca'u lo
tertrube'e zdani bei ca ro mumdei be'o gi'e za'o ja'odzu fe'eco'u lo
.fujin. cmana stedu .i pa'agi klama gi cirko lo pante cmima .ibo lo
.fujin. cmana stedu noi ru'i lo nicte cu farna ke'a cu culno lo visyvi'e
.i xukau sirji linji ro fasnu po lo vi terdi .i finti fo lo kamranxi pe
lo li'i pagbi'o lo nunpante fau lo nu zi co'u lo selpla tcika lo vanbi
kamgunma cu canci tai lo nu xruti fo lo nunjadypo'a






ni'o cino mo'o

lu ca'u lo gugde jdijmaji dinju fe lo pulji cu xedra'ejai li'u

de'i li renopare fi'o vreji lo tigni skina pe lo mentu be li ze pi'e
nobi

.i fe lo poi bandu tu'a lo vanbi pe lo gugde jdijmaji dinju ku'o pulji
lo nu xedra'ejai lo se no'a cu milxe minde .i se pi'o lo nu lo nu fe lo
noi .ei va'o lo fadni cu bandu lo selgu'e ku'o pulji fa lo selgu'e cu
xedra'ejai kei ranxi bo tcini cu se jarco cu pensi lo du'u sei xruti
pensi se'u lo pulji cu bandu ma kau ma kau kei ckini be lo gugde ciste
bei lo sivni prenu .i ge da'i nai ro lo nu cpedu cu se jalge lo nu fliba
gi ku'i fi lo na'e selsku pe lo la'e di'u nuncasnu ka'e cpacu fe lo du'u
ma'a ge makau terpa gi makau balvi djuno gi'e va'i sruma kei preti .i
ji'a mu'i lo nu lo du'u xu kau lo selsku seltcidu cu mapti lo da'i nai
jai se cu'u casnu cu cinri ku se pi'o lo nu te zu'e finti lo tolmapti
li'a be lo da'i nai jai se cu'u casnu be'o selsku bo seltcidu cu daspo
lo da'i nai nuncasnu selci'e .i se pi'o lo nu ge lo fatci lisri fi'o se
ranxi ku lo cfika cu gau mixre gi tcica fi lo nu jinvi lo nu lo da'i nai
pu fasnu cu dunli lo na pu fasnu cu jarco lo preti be lo du'u xu kau lo
smuni poi lo pulji cu spuda cu mapti lo smuni poi lo tersku cu djica






ni'o cipa mo'o

lu fe'e mo'u ca'u lo tertrube'e gubzda cu sraku jajgau loi festi li'u

de'i li renopare fi'o vreji lo tigni skina pe lo mentu be li bi pi'e
cixa

.i ca lo nondei ba lo dormidju fau lo nu brulu'i jajgau loi festi joi
pulce poi jmaji lo dargu cu klama lo crane be lo gubzda lo nenri be lo
dinju pe lo cinjuk. tcana .i ge lo nu fau lo nu fe lo nu no da sanji kei
ke mutce cmalu cilta bo pulce cu sraku jajgau cu crakla fi'o gradu lo
zu'o stapa cu jai mojgau lo ka mutce lo nuncpe co cmibi'o be lo'i pante
be tu'a lo ratnenfanri gi ku'i lo noi se tolcliva ku'o crane be lo
gubzda ro lo te sidbo be fi lo mintu ba'o se cliva .i ge loi nu loi so'i
prenu cu gunma klama ca lo so'a jeftu ca lo mumdei nicte lo crane be lo
gubzda be'o goi cy. gi'e kansa ponse lo cedra kei djedi ba'o purci se
cirko gi bu'u cy. lo po'o pulji pu ca'o zukcfu ke linji sanli .i ge lo
ji'a ranxi be lo zasni cambi'o ke ratnenfanri pante zukte cu ka'e smuni
gi ku'i ji'a lo nu ma'a po'u lo se gugde cu cnitcebi'o frili gi'e
cnimlibi'o frili kei fatci ba'o spisa se ganse






ni'o cire mo'o

lu .i lo ckiku pe lo mi zdani cu gau se fukpi gi'e fatri fi'o se cpana
lo klaji li'u

de'i li renopare fi'o vreji lo tigni skina noi mentu li pamu pi repa
ju'u xano

.i lo nu fukpi lo ckiku pe lo mi zdani cu se cpedu fi lo ckiku zarci ije
lo fukpi fatri lo to'e djuno prenu fi'o se cpana lo klaji pe la
akixabaran .i lo judri cu na te djuno .ije lo ckiku pe lo mi zdani cu
canja se flecu secau lo datni be lo du'u mokau lo ckiku bei tu'i makau
.i lo nu zbasu lo tcini no'u la'e lu lo ckiku pe lo mi zdani cu ru'i se
ponse le na srana prenu poi mi na djuno li'u be'o cu jarco li'a le fatci
ka na cumki be lo nu jikca jorne gi'e lo nu kansa se ponse vau lo drata






ni'o cici mo'o

lu .i lo djacu senta xi abu cu gau muvdu lo djacu senta xi by li'u

de'i li renopare lo relplita vidni ke punji larcu to ro da mentu be li
papa pi nore ju'u xano toi

.i lo djacu senta be fi'o se cpana lo klaji pe la tokion ce'e la cinjuk.
cu gau muvdu la nara'amatcin. noi jdice lo du'u ke'a zasni ke kajde
tutra zi'e noi li su'e reno cu kilto se mitre lo ke'a ni darno be le
fukuciman. pamoi ke ratni nejni ke dikca fanri noi le stuna gugdejupu ke
barda terdi bo desku pe de'i li renopapa cu xlura ke'a le za'i spufu .i
la nara'amatcin. noi ro lo ke'a xabju cu rivbi muvdu zo'u ca lo crisa be
de'i li renopare ge binxo na'e lo kajde tutra gi lo nu klama cu cumki .i
ku'i so'u xabju prenu se xruti mu'i lo nu dunku be lo nu dirce kakne
be'o e lo nu mulno daspo lo jmive jicmu ku .ije lo cilce srasu cu ze'u
banro po'o fi'o se cpana lo klaji noi ji'i no da klama .i va'o lo nu
preti lo du'u ta'i ma kau se nabmi lo fatci pe lo naldu'e darno be la
tokion be'o foldi ku lo nu mi canci ba'a gau zo'e zo'u se krasi lo se
pensi no'u xu kau lo djacu senta be fi'o se cpana lo klaji be'o gau
muvdu e'e po'o .i lo vikmi bonjarple poi ka'a temfesti pe lo benji ge
gau pencu jorne gi te zbasu lo kubli ije ne'i ri lo tivni pe lo re
fliracu cu renro gusni jarco .i ku'i lo ta stura tai lo za'i lo zgana ku
ga tarti sei lo finti ku tamsmi lo za'i pe'a cadzu lo tumla lo betfu gi
na'e ka'e zgana lo larcu

.i zoi fy © Yoshinori NIWA, la ponjbogri, 2013. fy

.i lo fukyzifpo'e cu curmi lo nu ro da pilno dei la'o fy Creative
Commons Attribution-NoDerivs 3.0 Unported License fy